17 Apr MERVIN WYATT-RAS: FASE TA UN FARCE
Parlamentario, drs. Mervin Wyatt-Ras, ta lamenta cu FASE ta un farce. FASE a ser lanta despues cu Aruba a ser confronta cu e virus di COVID-19. Segun e minister encarga cu Asuntonan Social, Glenbert Croes, e ta un ayudo Social di Emergencia pa esnan cu a perde trabou. Sinembargo esaki no ta e caso manera cu e minister aki ta gaba of ta insinua.
Mientrastanto tur esnan afilia na gobierno y famianan di gobernantenan a keda cu nan bunita salario, beneficionan y toelagen. Gobierno no a corta den su gastonan di luho. Enbes cu gobierno a bai na tur hende, incluyendo nan “friends and family” pa entrega algo pa yuda nos pueblo nan no a haci esaki. Awor hasta e minister ta gaba cu e ta bai sigui cu fase y lo yama TIO (Tijdelijke Inkomstenondersteuning), cual ta ensera mas placa. E suma lo ta mara na e ultimo entrada di e cuidadano di minimo 1250 y maximo 2950. Esaki ta un promesa djies paso ta campaña. Paso mientras tin hende cu no tin cuminda na un banda e minister ta gaba cu e lo hisa e suma di FASE. Wyatt-Ras a yega si sugeri e minister pa registra kendenan no ta bin na remarca pa FASE pa por dunanan ayudo pero ni musca no a bula. Minister Glenbert Croes no ta serio paso e no ta informa nos hendenan debidamente.
Parlamento den reunion cu gobierno tocante landspaketten, despues e baca a hoga caba, por a tuma nota cu e minister aki y su gobiero ya caba a compromete Aruba cu Hulanda cu lo bin un dado momento flexibilisacion di nos mercado laboral y cu lo tin tambe un werkeloosheidsuitkering. Es decir anticipando riba retironan gobierno kier suavisa esakinan dor di duna e sumanan y bin cu TIO pa sera boca di pueblo. Esey ta encera tambe cu lo kita of lo bai permiti cu lo kita nos hendena for di trabou. Wyatt-Ras ta di opinion cu gobierno no mester gaña nos hendenan. Gobierno mester ta transparente y sincero. Gobierno mester papia cu berdad. Gobierno no mester presenta algo bunita pa despues nos hendenan haya un bofta den cara. Pues henter e asunto di FASE aki Wyatt-Ras ta haya ta un farce y ademas henter e forma con ta anda cu e area social. E minister aki a bisa cu tin crisis social y a haya for di parlamento e aprobacion pa un suma pa combati e crisis aki. Sinembargo e no a haci loke el a priminti. Te aina tin instancianan cu no a haya e yudansa cu nan a ser priminti dor di minister. Pa loke ta trata yudansa pa victimanan di abuso di mucha tampoco no a haya ningun solucion. Tin plan cu a ser traha dor di profesionalnan, pero no a ser ehecuta dor di e gobernacion aki. Wyatt-Ras tabata critico riba e fondo di crisis social y a haci cantidad di preguntanan al respecto tanto den reunionnan publico como por escrito, sinembargo gobierno tog no a considera pa asina tene cuenta cu sugerencianan. Wyatt-Ras ta haya cu den pandemia por a usa formanan nobo pa comunica cu e cliente den problema, p.e. via di un app of website, banda di telefon y whatsapp cu ta ser usa caba. Sinembargo ora topa clientenan cu problemanan psychosocial nan ta canando rond sin haya oido paso gobierno no kier facilita formanan mas moderno di comunicacion cu cliente. En efecto gobierno a pone alrededor di 50 trahado extra, pero sin e medionan dor di cual e cliente no ta ser yuda manera mester ta.
Gobierno a haya casi 4 aña pa alivia loke nan a yama crisis y si berdaderamente tabatin crisis mester a duna e solucion de inmediato. Hasta gruponan di accion a demostra y nada no a ser cumpli cu nan.
Fuente: 24ora.com
No Comments